2B- Kind uşaq xeyriyyə fondu haqqında

təqribən 1 il öncə yaranan ideyamızı reallaşdırıb həyata keçirməyimiz xəbərini sevinc hissi ilə sizlərlə bölüşürük.

2B_Kind (ingiliscədən tərcümədə nəzakətli, almancadan tərcümədə uşaq olmaq anlamında) cəmiyyəti ölkəmizdə və dünyada yaşanan bir çox problemlərin təməlində yetərsiz təhsilin, yoxsulluqdan doğan savadsızlığın olduğunu görərək, bu problemlərin həllində bir qatqı məqsədi ilə yola çıxan və könüllü dostlarımızın yardımı ilə qurulmuş bir xeyriyyə cəmiyyətidir.

Məqsədimiz ehtiyaclı və xüsusən də təhsildən kənar qalan uşaqlara mümkün olan dəstək və yardımı göstərməkdir: həm maddi, həm mənəvi cəhətdən, və ən asası DAVAMLI olaraq! Bunu qeyri-rəsmi himayəçilik də adlandıra bilərik. Bu, uşaqların hər birinin problemleri ilə maraqlanmaq, onları necə aradan qaldıra biləcəyimizi araşdırmaq vəzifələrini öhdəmizə götürmək deməkdir.

Təhsil, hər bir çətinliyin həlli və firavan gələcəyin əsasıdır. Bu gün ehtiyaclı və yardım ediləcək uşaqlar, sabah əldə etdikləri təcrübələri digərləri ilə bölüşərək, özləri yardımsevər və ianəçi olacaqlar. Buna əminik!

Xeyriyyə cəmiyyətimizin əsası, 10 və 17 yanvar 2021-ci il tarixində baş tutan təsis yığıncaqlarında qoyulmuşdur. Almaniyada xeyriyyə cəmiyyətlərinin rəsmi reyestrində qeydiyyatdan keçmək üçün müraciət edilmişdir. Cəmiyyətin nizamnaməsi və üzvlük haqqında əsasnamə alman, azərbaycan və ingilis dillərində hazırlanmışdır və marağında olan hər bir şəxsə göndərilə bilər.

Siz də bizim fonda üzv olaraq və ya üzv olmadan ianəçi ola bilərsiniz. Bildirdiyimiz kimi, toplanan ianələr və üzvlük haqları, fondun təşkilati xərcləri çıxıldıqdan sonra, yalnız və yalnız fondun yuxarıda göstərilən məqsədləri üçün sərf ediləcəkdir.

Qeyd etdiyimiz kimi, bu yalnız maddi (məktəbli paltarı, çanta, ləvazimat, qida) deyil, həmçinin onlara gələcək təhsil istiqamətlərini müəyyənləşdirməkdə olunacaq mənəvi köməyi və onların həyatlarında mühüm rol oynayacaq, onlarda əzmkar iradə və ruh formalaşdıracaq psixoloji dəstəyi də nəzərdə tutur.

Birliyimiz istisnasız olaraq istənilən siyasi və etnik ideyalar xaricindədir. Tək qazancımız ətrafımıza yaşada biləcəyimiz, ən kiçik də belə olsa, faydadır.

Hörmətlə,

2B-Kind İdarə Heyəti